Is-sena skolastika tiġi fi tmiemha llum għal ħafna u ċertament li numru ta’ għalliema ħa jkunu qed jiċċelebraw il-bidu tal-vaganzi tagħhom. Insomma l-kelma tgħid hekk, għax il-preparament għas-sena skolastika l-ġdida jkunu diġà fis-seħħ.
Għal dawn l-aħħar sentejn l-għalliema tal-Kulleġġ Santa Klara, tal-iskola Sekondarja f’Pembroke ħarġu filmat li nissel tbissima. Filmat qasir ta’ kif l-għalliema u l-membri ta’ staff ingħaqdu flimkien biex jibdew il-vaganzi.
Il-mistqosija tiġi weħidha, tgħid ħa naraw xi filmat ieħor din is-sena mingħand dawn l-għalliema jew forsi tħajjar xi ħaddieħor. Jekk ma naraw l-ebda filmat nassumu li din is-sena kienet ħerqana aktar li jibdew igawdu l-baħar qabel jibdew jaħdmu għas-sena li jmiss.
Ħsibna nagħmlu lista ta’ għaliex nemmnu li l-għalliema għandhom bżonn il-vaganzi tas-sajf!
Jorqdu
Matul is-sena skolastika, ħafna minnhom jispiċċaw jorqdu anqas sabiex jippreparaw, jikkoreġu u jlestu miljun ħaġa oħra. Dan kollu waqt li jipprovaw ikomplu għaddejjin b’ħajjithom. Naqa diffiċli hux?
Ftit Ħin Għalihom
Min ma jieħux gost igawdi ftit? Jagħmel dak li jħobb. Anke jekk sempliċiment ipoġġi bilqiegħda u ma jagħmel xejn! Dak il-ftit ħin tiegħek tkun tridu. Jgħinek mentalment!
Ħin Mal-Familja u Ħbieb
Ħafna drabi matul is-sena skolastika dawn bilkemm igawdu u jaraw lil sħabhom l-għalliema mill-inqas jew dejjem bil-ġenn, sakemm ma tkunx okkażżjoni speċjali. Fis-sajf ikollhom ċans iqattgħu ftit ħin ta’ kwalità flimkien.
Jippreparaw
Għalliem, dejjem għalliem sajf u xitwa. Jekk ma jkunx qed jgħallem xi ftit privat waqt dan iż-żmien, bil-kalma u l-pass tiegħu jsib bilanċ bejn id-divertiment u l-preparazzjoni għas-sena skolastika li jkun imiss.
Isibu L-Enerġija Għas-Sena Skolastika L-Ġdida
Ħafna jqabblu l-għalliema ma’ batterija. F’Settembru tkun ikkargata lesta, iżda max-xhur il-batterija tibda titlef is-saħħa tagħha u tispiċċa f’Ġunju. Tiċċarġja ruħha fis-Sajf u tkun lesta għal meta l-istudenti jidħlu lura.
Insomma, aħna ta’ Gwida.mt nawguraw lil għalliema kollha u anke l-istudenti s-sajf it-tajjeb! Gawdu u ħudu gost!
