Din is-sena Pierre Cordina ħass li wasal iż-żmien li jieqaf mill-programm tiegħu ta’ kuljum wara nofsinhar fuq Magic Malta 91.7, sabiex ikun jista’ jibdel ir-rutina tiegħu u jkollu aktar ħin għall-familja, b’mod partikolari għal bintu Luisa Pia.
Hu spjega li, hekk kif Luisa Pia bdiet l-iskola primarja, ried ikun aktar preżenti f’dan il-kapitlu ġdid ta’ ħajjitha u, fuq kollox, ikun hemm għaliha wara l-iskola.
Meta tkellem fuq Illum ma’ Steph, Pierre saħansitra rrefera għal ritratt memorabbli u qal: “L-ewwel darba li kont għaddejt għaliha wara l-iskola.”
F’messaġġ fuq Facebook, Pierre qal li d-deċiżjoni li jitbiegħed mill-programm ta’ kuljum ma kinitx faċli, iżda kienet waħda li ħass li kellu jieħu biex jagħti prijorità lil dak li hu l-aktar importanti għalih.
Hu rringrazzja lil Magic Malta 91.7 għall-vjaġġ, il-memorji u lil dawk kollha li qasmu miegħu l-ħinijiet ta’ wara nofsinhar matul is-snin.
“Kultant mhuwiex li qed iċċedi xi ħaġa... imma li qed tagħżel dak li hu l-aktar importanti,” kiteb Pierre, f’messaġġ mill-qalb li juri l-valur li jagħti lill-ħin mal-familja tiegħu.
