Il-Malta Ranger Unit ressqet rapport quddiem l-Awtorità għall-Ambjent u r-Riżorsi (ERA) wara li, skontha, inħarqet ħuġġieġa direttament fuq art protetta Natura 2000 waqt il-festa tal-Kappella ta' Santa Marija Maddalena f'Ħad-Dingli.
F'post fuq il-midja soċjali, l-għaqda qalet li filwaqt li r-Rangers tagħha jaħdmu bla waqfien biex jedukaw lill-pubbliku dwar is-sigurtà tan-nirien u jipprevjenu ħruq f'siti naturali protetti, f'dan il-każ ġiet organizzat ħuġġieġa direttament fuq il-garigue protetta.
Skont il-Malta Ranger Unit, in-nirien ikkawżaw ħsara lil diversi arbuxelli protetti tal-lentisk u ħallew medda ta' art maħruqa fi ħdan is-sit Natura 2000.
L-għaqda sostniet li t-tqabbid ta' nar direttament mal-art u d-degradazzjoni tas-sit imorru kontra r-regolamenti tas-sussidjarja leġiżlattiva SL 549.40 dwar il-ħarsien tal-indafa u l-ambjent. Żiedet li l-ħsara kkawżata lil siġar u arbuxelli protetti tista' wkoll twassal għal multi sostanzjali skont ir-regolamenti SL 549.123 dwar il-protezzjoni tal-boskijiet u l-veġetazzjoni. Barra minn hekk, sostniet li hemm il-possibbiltà li n-nirien qatlu annimali selvaġġi li kienu qed jistkennu fost l-arbuxelli.
Il-Malta Ranger Unit ikkonfermat li ressqet rapport uffiċjali lill-ERA u talbet lill-awtorità tieħu l-passi legali meħtieġa. L-għaqda qalet li jekk persuna privata twettaq att simili, normalment tiffaċċja prosekuzzjoni, u sostniet li l-istess prinċipju għandu japplika f'dan il-każ ukoll. Hija żiedet li bħalissa qed tistenna aġġornament mill-awtorità dwar il-każ.
Fl-appell tagħha, il-Malta Ranger Unit qalet li l-ħsara setgħet ġiet evitata kompletament kieku l-ħuġġieġa nbniet b'mod responsabbli u elevat mill-art, filwaqt li kienet tkun eżempju pożittiv għal oħrajn.
L-għaqda fakkret ukoll li Malta bħalissa qed tesperjenza mewġa ta' sħana u appellat lill-pubbliku biex juri rispett lejn l-uffiċjali tal-Protezzjoni Ċivili billi jevita kull imġiba li tista' żżid ir-riskju ta' nirien. Temmet il-messaġġ tagħha billi ħeġġet lill-pubbliku jirrispetta n-natura u jħalli l-ambjent kif sabu.
Facebook / Malta Rangers Unit
