L-attriċi lokali Sarah Lee Zammit qasmet messaġġ emozzjonanti u mimli riflessjoni hekk kif hi u l-familja tagħha ċċelebraw il-magħmudija ta’ binthom. F’kitba personali fuq il-midja soċjali, Sarah Lee fetħet qalbha dwar il-vjaġġ li bidlilha ħajjitha u kif illum tħares lejn il-ħajja b’mod differenti minn qabel.
“Din il-mixja bidlitni profondament,” kitbet l-attriċi, filwaqt li spjegat kif darba kienet temmen li trid dejjem timbotta lilha nnifisha aktar, tegħleb kull limitu u tibqa’ tikseb aktar suċċessi permezz tas-saħħa u d-determinazzjoni tagħha.
Madankollu, qalet li maż-żmien kellha “titgħallem tinsa” din il-mentalità. Sarah Lee fissret kif, proprju meta ċediet u ħalliet il-ħajja tieħu l-kors tagħha, sabet dak li tassew kien importanti għaliha, fosthom l-imħabba.
Hi qalet li wieħed mill-isbaħ rigali li tathielha l-ħajja kien li tiltaqa’ mar-raġel li llum huwa s-sieħeb tagħha u missier binthom. “Qalbi mimlija bl-imħabba, gratitudni, tenerezza u tama,” kompliet tikteb hekk kif iċċelebrat il-magħmudija tat-tifla tagħhom.
L-attriċi temmet il-messaġġ tagħha b’awguri lil kulħadd sabiex ikollu l-kuraġġ jagħraf u jħaddan is-sbuħija li teżisti fil-ħajja ta’ kuljum. Il-kitba tagħha ġabet magħha ħafna kummenti pożittivi mingħand segwaċi u ħbieb li awguraw lill-familja kull ġid għal dan il-kapitlu ġdid f’ħajjithom.
Facebook / Sarah Lee Zammit
