L-attur Taljan magħruf Raoul Bova tħabbar bħala l-aktar mistieden speċjali ġdid li se jingħaqad mal-edizzjoni ta’ din is-sena ta’ Una Notte Con Le Stelle, li se ssir fil-5 ta’ Settembru fil-Fosos tal-Furjana.
It-tħabbira saret waqt konferenza tal-aħbarijiet li għaliha attendiet ukoll il-preżentatriċi u kantanta Taljana Lorella Cuccarini, li se tkun qed tippreżenta s-serata flimkien mal-ġurnalist u preżentatur Malti Keith Demicoli.
L-avveniment se jlaqqa’ fuq l-istess palk numru ta’ artisti leġġendarji tax-xena mużikali Taljana, fosthom Loredana Bertè, Fausto Leali, Patty Pravo u Raf. Il-programm se jiftaħ bil-Four Italian Tenors, filwaqt li matul il-lejla se jkun hemm ukoll dehriet minn Ambra Angiolini, Cristiano Malgioglio, Alessandra Celentano u Rudy Zerbi, żewġ uċuħ magħrufa sew mill-programm popolari Amici di Maria De Filippi.
Bħalma saret tradizzjoni, lejn tmiem is-serata se jingħataw premjijiet speċjali lill-artisti bħala rikonoxximent tal-karrieri tagħhom u tal-kontribut li taw lid-dinja tal-mużika. Il-biljetti għall-avveniment huma disponibbli minn showshappening.com.
