Nhar il-Ħadd 25 ta’ Ottubru, l-Isla se toffri esperjenza tassew interessanti għal dawk kollha li jħobbu l-istorja ta’ pajjiżna, hekk kif se tittella’ l-ewwel edizzjoni ta’ Ħsejjes tax-Xelter, attività li se tiftaħ għall-pubbliku parti mix-xelter storiku ta’ din il-lokalità. Din l-inizjattiva se tagħti opportunità lill-viżitaturi biex jiskopru aktar dwar il-ħajja matul it-Tieni Gwerra Dinjija, partikolarment l-esperjenzi ta’ dawk li kienu jfittxu kenn fix-xelters waqt il-bumbardamenti li ħallew impatt kbir fuq il-Gżejjer Maltin.
Matul l-attività se jkun hemm rikostruzzjonijiet storiċi li se juru kif kienet il-ħajja f’dak iż-żmien, filwaqt li l-pubbliku se jkun jista’ jisma’ wkoll rakkonti personali u memorji ta’ residenti Sengleani li għexu l-esperjenza tal-gwerra. Permezz ta’ intervisti u stejjer li għaddew minn ġenerazzjoni għal oħra, il-viżitaturi se jkollhom iċ-ċans jifhmu aħjar id-diffikultajiet, il-biżgħat u l-isfidi li kienu jiffaċċjaw il-familji matul wieħed mill-aktar perjodi diffiċli fl-istorja ta’ Malta.
Element interessanti ieħor se jkun l-użu tat-teknoloġija tar-realtà virtwali (VR), li permezz tagħha dawk preżenti se jkunu jistgħu jaraw filmati minn ġewwa x-xelter u jiskopru dan il-post storiku minn perspettiva differenti. Din l-esperjenza se tgħaqqad l-istorja mat-teknoloġija moderna, b’mod li jagħmilha aktar interessanti u aċċessibbli għal udjenzi ta’ kull età. L-inizjattiva tħabbret mill-Ministru għall-Gvern Lokali u x-Xogħlijiet Pubbliċi, Alison Zerafa Civelli, flimkien mas-Sindku tal-Isla, Clive Pulis, u d-Direttur għall-Istrateġija u l-Implimentazzjoni għall-Gvern Lokali, Marisa Pisani.
Il-Ministru saħqet fuq l-importanza li l-wirt storiku u kulturali tal-lokalitajiet Maltin jibqa’ jiġi mħares u jingħata ħajja ġdida, filwaqt li s-Sindku Clive Pulis irringrazzja lill-Ministeru għall-appoġġ u l-fondi li qed jagħmlu din l-inizjattiva possibbli. Permezz ta’ Ħsejjes tax-Xelter, il-Kunsill Lokali tal-Isla qed jagħmel pass importanti biex dan il-wirt storiku jsir aktar aċċessibbli għall-pubbliku, filwaqt li jkompli jżomm ħajjin il-memorji ta’ dawk li għexu l-gwerra.
Opportunità mill-isbaħ biex il-familji, iż-żgħażagħ u dawk kollha li jinteressaw ruħhom fl-istorja jiskopru aspett importanti mill-passat ta’ pajjiżna, proprju fil-post fejn seħħew tant minn dawn l-esperjenzi.
