Tfal imwielda bla jdejn qed jirċievu b’xejn idejn prostetiċi (foloz) b’disinji personalizzati. Dan grazzi għal żewġt irġiel li qed jaħdmu minn kamra tal-injam fi ġnien fi Swansea f’Wales.
Stephen Davies u Drew Murray, li jsejħu lilhom infushom ‘Team Unlimbted’, jiddisinjaw dawn l-idejn personalment u jagħtuhom b’donazzjoni lil tfal madwar id-dinja kollha. Minn qabel it-tfal jagħżlu l-kulur u d-disinn tal-id prostetika, u Stephen u Drew jieħdu ħsieb il-kumplament. Permezz ta’ dawn l-idejn it-tfal ikunu jistgħu jgħawġu l-minkeb u jiftħu u jagħlqu jdejhom f’ponn biex jaqbdu l-affarijiet. Stephen li huwa enġinier, huwa missier ta’ tifel li twieled bla id. Huwa kien iddiżappuntat bl-id prostetika li ibnu ngħata minn sptar fir-Renju Unit. Wara li għamel riċerka huwa sar jaf bi grupp volontarju bl-isem ta’ Keynes li jagħmlu jdejn prostetiċi lit-tfal. Ibnu kien tassew kuntent b’din l-id ġdida. Stephen ingħaqad ma’ Keynes biex flimkien itejbu d-disinn tal-idejn u b’hekk inħoloq ‘Team Unlimbted’. Kull id tiswa anqas minn $26 f ’materjal u madwar 12-il siegħa xogħol biex tinħadem. “Mhux l-eroj kollha jilbsu l-mantell.” Din hija s-slowgan ta’ ‘Team Unlimbted’
Mill-banda l-oħra, kif kulħadd jaf, ħafna drabi l-kimoterapija tħalli lill-pazjenti bla xagħar u li b’hekk ikollhom bżonn jilbsu parrokka. Iżda l-ġilda tal-pazjenti ċkejknin li qed jiġġieldu l-kankru, hija sensittiva wisq biex jilbsu parrokka normali.
Kien għalhekk li żewġ ommijiet mill-Alaska waqqfu organizzazzjoni volontarja li jagħmlu parrokki speċjali lil dawn it-tfal. Il-proġett, li jġib l-isem ‘The Magic Yarn Project’, ispirat mill-prinċipessi ta’ Disney, jagħti ċ-ċans lit-tfal li jagħżlu l-parrokka li jixtiequ huma u l-voluntiera jġibu l-maġija u l-immaġinazzjoni ta’ dawn iċ-ċkejknin f’realtà billi jagħmluhielhom. Dawn il-parrokki huma magħmulin kompletament minn suf fin, artab u kkulurit, u huma komdi u siguri biex tilbishom, filwaqt li jġibu tbissima fuq fomm dawn it-tfal.
Naf li inti li qed taqra tixtieq tgħin lil tfal f’sitwazzjonijiet simili t’hawn fuq u ħafna oħrajn bħalhom imxerrdin mad-dinja kollha. Missio Malta qed jagħmel ħiltu kollha sabiex kull persuna jkollha opportunità li tgħix ħajjitha b’dinjità. Agħmel kuntatt magħna jekk tixtieq tgħin. Aktar informazzjoni tinkiseb minn fuq il-websajt www.missio.org.mt, minn Facebook jew fuq 2123 6962. Grazzi mill-qalb.
