Bħala parti mill-kampanja nazzjonali Show Your Face – Research Today, A Cure Tomorrow, il-Cancer Research & Innovation Hub Malta (CRIHM) se jorganizza tmien seminars matul ix-xhur ta’ Ottubru u Novembru, bil-għan li jwassal aktar għarfien dwar il-kanċer, il-prevenzjoni u r-riċerka direttament għand il-pubbliku.
Is-seminars kollha se jkunu b’xejn u miftuħa għall-pubbliku, bl-ewwel attività mistennija ssir nhar l-Erbgħa 7 ta’ Ottubru fl-Università ta’ Malta, waqt il-Freshers’ Week, bejn id-9.00 u n-12.30.
U l-ewwel seminar se jibda minn mistoqsija interessanti: Nistgħu nkunu pass ’il quddiem mill-kanċer? Taħt it-titlu Can You Outsmart Cancer? AI, Innovation & Cancer Careers, is-seminar se jesplora kif ix-xjenza, it-teknoloġija u l-innovazzjoni qegħdin ibiddlu l-mod kif issir ir-riċerka dwar il-kanċer.
Illum, dan il-qasam ma jinvolvix biss tobba u xjenzati fil-laboratorju. L-intelliġenza artifiċjali, l-analiżi tad-data u t-teknoloġija qed ikollhom rwol dejjem aktar importanti biex jgħinu lir-riċerkaturi jifhmu aħjar il-marda u jiżviluppaw metodi u tekniki ġodda għall-futur.
Minħabba li l-ewwel attività se ssir waqt il-Freshers’ Week, din tista’ tkun ta’ interess partikolari għal studenti li għadhom kemm bdew il-vjaġġ universitarju tagħhom, kif ukoll għal dawk li qed jikkunsidraw karriera fix-xjenza, is-saħħa, ir-riċerka jew it-teknoloġija.
Madankollu, l-attività mhix indirizzata biss lejn l-istudenti. Kull min jixtieq ikun jaf aktar dwar ir-riċerka fuq il-kanċer, l-innovazzjoni u l-iżviluppi xjentifiċi f’dan il-qasam huwa mistieden jattendi.
Dan se jkun biss il-bidu ta’ sensiela ta’ tmien attivitajiet li se jittellgħu matul Ottubru u Novembru f’diversi postijiet madwar Malta u Għawdex bħala parti mill-kampanja Show Your Face – Research Today, A Cure Tomorrow.
L-ewwel seminar, Can You Outsmart Cancer? AI, Innovation & Cancer Careers, se jsir l-Erbgħa 7 ta’ Ottubru 2026, bejn id-9.00 u n-12.30, fl-Università ta’ Malta waqt il-Freshers’ Week. Id-dħul huwa b’xejn u l-attività hija miftuħa għall-pubbliku ġenerali.
Ir-riċerka dwar il-kanċer ma sseħħx biss fil-laboratorju. Dak li qed jiġi skopert u żviluppat illum jista’ jgħin biex għada tinbidel il-ħajja ta’ ħafna.
