Kostum nazzjonali mill-isbaħ, ispirat minn wieħed mill-aktar simboli naturali prezzjużi ta’ Malta – Widnet il-Baħar, il-fjura nazzjonali Maltija. Il-kostum huwa ġieħ lil din il-fjura rari u endemika għall-Gżejjer Maltin, magħrufa għall-kapaċità tagħha li tikber qalb l-irdumijiet tal-franka qrib il-baħar. Għaldaqstant, Widnet il-Baħar mhux biss tirrappreżenta s-sbuħija naturali ta’ pajjiżna, iżda wkoll is-saħħa u r-reżiljenza tal-poplu Malti.
Il-kuluri vibranti tar-roża u l-fuchsia fil-kostum jirriflettu l-fjura meta tkun fl-aqwa tagħha, filwaqt li d-dettalji bil-kristalli u l-fjuri maħduma bl-idejn jagħtu l-ħajja lill-petali delikati tagħha. Element li żgur jiġbed l-għajn huwa l-kappa kbira bil-piegi, li meta tinfetaħ tfakkar f’petali ta’ fjura mċaqalqa mir-riħ tal-baħar. Il-kostum huwa komplut b’tiżjin elaborat tal-fidda fuq ir-ras, ispirat kemm mill-fjura nnifisha kif ukoll mill-wirt artistiku Malti.
Il-preżentazzjoni tal-kostum quddiem il-fortifikazzjonijiet tal-ġebla Maltija u l-kosta kompliet issaħħaħ il-messaġġ tiegħu – taħlita bejn in-natura, l-istorja u l-identità ta’ pajjiżna. Bħal Widnet il-Baħar, Malta tista’ tkun żgħira fid-daqs, iżda tibqa’ unika fis-sbuħija u b’saħħitha quddiem kull sfida. Dan il-kostum għalhekk mhuwiex biss ċelebrazzjoni tal-fjura nazzjonali tagħna, iżda ġieħ lil Malta, lill-wirt tagħha u lill-kapaċità tagħha li tibqa’ tiffjorixxi minkejja kollox.
Facebook / Nicole Spiteri
