Hekk kif il-Sanremo Music Festival 2026 qed joqrob lejn is-serata finali li ssir nhar is-Sibt li ġej, l-attenzjoni qed tiffoka fuq diversi ismijiet li jistgħu jgħollu t-trofew prestiġjuż tat-Teatru Ariston. Fost il-favoriti msemmija mill-pubbliku hemm Serena Brancale u Arisa, li b’interpretazzjonijiet b’saħħithom u stil distint irnexxielhom jirbħu s-simpatija tal-udjenzi.
Serena Brancale spikkat b’enerġija friska u emozzjoni kbira, filwaqt li Arisa reġgħet uriet il-maturità artistika tagħha permezz ta’ prestazzjoni emozzjonali u teknika raffinata. Fost il-Maltin, dawn iż-żewġ kantanti qed jissemmaw b’mod konsiderevoli bħala kandidati validi għar-rebħa.
Madankollu, skont id-djar tal-imħatri Taljani, l-istorja tidher kemxejn differenti. Minħabba l-fama u l-esperjenza tagħhom, Marco Masini u Fedez qed jitqiesu bħala l-favoriti nett biex jirbħu l-festival. Għalkemm fost il-pubbliku Malti isimhom forsi mhux qed jissemma bl-istess intensità, il-bookmakers qed jagħtuhom l-ogħla ċansijiet li jtellgħu t-trofew.
Sadanittant, Sal Da Vinci qed jidher fir-raba’ post skont l-istess djar tal-imħatri, pożizzjoni li xorta tagħmlu kompetitur b’saħħtu u kapaċi jissorprendi fl-aħħar mumenti tal-kompetizzjoni.
B’hekk, waqt li l-opinjoni tal-pubbliku tista’ tkun maqsuma bejn freskezza u tradizzjoni, id-djar tal-imħatri qed jindikaw li l-esperjenza u l-popolarità jistgħu jkunu fattur determinanti. Kollox issa jiddependi mill-voti finali u Sanremo, bħas-soltu, jista’ jġib sorpriżi sal-aħħar nota.
Facebook / Festival Di Sanremo
