Bħal-lum sena niftakru meta Francesca Borg tilfet lil binha Zaylin, jum li jerġa’ jiftaħ ferita profonda iżda fl-istess ħin iġib miegħu tifkira qawwija tal-imħabba li qatt ma tista’ tmut. F’messaġġ personali u emozzjonali ħafna, hija qasmet kif dan il-jum ġiegħlha terġa’ tgħix is-skiet, in-nuqqas u l-uġigħ, iżda wkoll l-imħabba kbira li tibqa’ marbuta ma’ binha għal dejjem.
Francesca spjegat kif, biex tesprimi dak kollu li tħoss, kitbet diska minn qalbha stess. Kull kelma fil-lirika hija rifless ta’ dak li għaddiet minnu matul din is-sena: mistoqsijiet bla tweġiba, telf li diffiċli taċċettah, u memorji li jibqgħu ħajjin f’kull mument ta’ kuljum tagħha. Il-kliem tal-kanzunetta juri wkoll kemm l-imħabba tagħha lejn Zaylin ma naqsitx, iżda saret aktar profonda maż-żmien.
Fil-messaġġ tagħha, hija rringrazzjat ukoll lil Cathy K għall-editjar tal-video, filwaqt li faħħret ix-xogħol, id-dedikazzjoni u l-ħin li tat biex twassal b’mod viżiv din il-memorja daqshekk personali u sensittiva.
Dan kollu jwassal għal messaġġ wieħed ċar u qawwi: l-imħabba ta’ omm ma tintemm qatt. Għalkemm Zaylin m’għadux fiżikament preżenti, jibqa’ dejjem f’qalbha, fil-ħsibijiet tagħha u f’kull tifkira li żżommha marbuta miegħu.
Facebook/Francesca Borg
