Mument speċjali għall-Maltija Faith Micallef Galea hekk kif kisbet suċċess fil-Best Model of Universe 2026, li sar fi Spanja. Il-kisba tagħha qanqlet reazzjoni mill-isbaħ mingħand dawk l-aktar qrib tagħha, li esprimew il-kburija tagħhom b’dak li qed jirnexxielha twettaq minn età daqshekk żgħira.
“Ma nistgħux inkunu aktar kburin bik, Faith! Li naraw dak kollu li qed tikseb f’età daqshekk żgħira jimlielna qalbna b’tant ferħ u gratitudni,” inkiteb f’messaġġ iddedikat lilha. Faith ġiet deskritta bħala tfajla b’qalb tajba u determinata, filwaqt li ġiet imħeġġa biex tkompli temmen fiha nnifisha u taħdem biex tilħaq il-ħolm tagħha.
Fil-messaġġ ma naqasx ukoll ir-ringrazzjament lil dawk li kienu parti minn dan il-vjaġġ. Janice Busuttil ġiet irringrazzjata talli tat lil Faith din l-opportunità u emmnet fil-potenzjal tagħha. Ringrazzjament speċjali ngħata wkoll lil Joanne Farrugia, il-mentor tagħha fil-qasam tal-immudellar, għad-dedikazzjoni u l-gwida tagħha. Kienet hi li għenet lil Faith taħdem fuq il-mixja tagħha fuq il-catwalk u tibni aktar kunfidenza fiha nnifisha.
“Faith, kompli emmen, kompli iddi u kompli iġri wara l-ħolm tiegħek,” temm jgħid il-messaġġ, filwaqt li din il-kisba ġiet deskritta bħala waħda li żgur mhux se tintesa. Prosit lil Faith Micallef Galea għal din l-esperjenza u l-kisba tagħha fi Spanja. Nawgurawlha aktar suċċessi fil-vjaġġ tagħha fil-qasam tal-immudellar!
