Josmar illum jiċċelebra għeluq is-36 sena tiegħu, u għal din l-okkażjoni għażel li jaqsam riflessjoni mill-qalb dwar il-vjaġġ li għadda minnu tul ħajtu. “Kapitlu 36. Imxejt triq twila. Għaddejt minn affarijiet li bidluni, poġġewni għall-prova, għallmuni nkun aktar umli u għallmuni aktar milli qatt stennejt,” kiteb Josmar.
Hu tkellem ukoll dwar it-tlugħ u l-inżul li ġġib magħha l-ħajja. “Tlift, irbaħt, dħakt, bkejt, għamilt żbalji… u b’xi mod, minkejja kollox, għadni hawn. Għadni fuq saqajja. Għadni noħlom. Għadni nidħak fl-aktar mumenti mhux xierqa! Tiġri ħafna din,” kiteb b’dik id-daqqa ta’ umoriżmu li tant hu magħruf għaliha.
Josmar stqarr li jinsab grat għal kull kapitlu ta’ ħajtu, inkluż dawk li kienu aktar diffiċli. “Grat għal kull kapitlu, anke dawk diffiċli, għaliex għamluni l-persuna li jien illum.” “36 sena. Ftit aktar għaqli, ħafna aktar grat… u għadni nipprova nifhem din il-ħaġa kollha li nsejħulha ħajja,” kompla jgħid.
Hu temm il-messaġġ tiegħu b’ħarsa lejn dak li hemm lest għalih fis-sena li ġejja, “Kapitlu 36… ejja naraw x’għandek lest għalija,” qabel għalaq bi kliem sempliċi iżda sinifikanti, “Grazzi Mulej.”
Aħna ningħaqdu mal-ħafna awguri u nawguraw lil Josmar l-isbaħ xewqat f’għeluq is-36 sena tiegħu! Nawgurawlu sena mimlija b'dak kollu li tixtieq qalbu!
Facebook / Ryan and Josmar
