Issa li l-eċitament tal-Junior Eurovision beda jikkalma, hemm ħaġa waħda li nistgħu ngħidu b’ċertezza: għandna għalfejn inkunu kburin li aħna Maltin. Mill-koreografija u l-preżentaturi, sal-palk, id-dawl, il-viżwali u dik l-atmosfera tipikament Maltija, kull dettall ingħaqad biex inħoloq spettaklu li żgur se jibqa’ mfakkar. Iżda qalb il-kuluri, il-mużika u l-eċitament kollu, kien hemm xi ħaġa li forsi ma ndunajtx biha... Int innutajt il-band? U le, mhux qed nitkellmu dwar band tradizzjonali li mdorrijin naraw fuq palk. Qed nitkellmu dwar Big Friends Guggen Musik Malta (BFGM), il-Guggen band Maltija li ġabet magħha taħlita ta’ brass, perkussjoni, dwal u enerġija li diffiċli tinjoraha.
Jekk il-kelma Guggen hija ġdida għalik, hemm ċans kbir li l-ħoss mhuwiex. Aħseb brass. Aħseb perkussjoni. Aħseb mużika pop magħrufa... iżda b’aktar enerġija, aktar ħoss u stil li kważi jagħmilha impossibbli li tibqa’ bilqiegħda! Ir-repertorju tal-BFGM jaqsam bejn ġenerazzjonijiet differenti. Insibu klassiċi bħal Que Sera, Sera, YMCA u Toccata, iżda wkoll mużika kummerċjali aktar moderna bħal Viva La Vida, Bangarang u Per Sempre Sì.
Iżda l-mużika hija biss parti mill-istorja. Ħares ftit aktar mill-qrib lejn il-mużiċisti u tinduna b’xi ħaġa oħra. Parti kbira mill-band hija magħmula minn teenagers u żgħażagħ. Hija proprju din l-enerġija żagħżugħa li tagħti lill-grupp dik l-identità partikolari. Ġenerazzjoni ta’ mużiċisti Maltin li qed tieħu l-brass u l-perkussjoni lil hinn mill-ambjent tradizzjonali u tagħtihom stil kompletament differenti. U fil-Junior Eurovision kellhom l-opportunità perfetta biex juruh. Mill-Warm-Up... Għal Qalba tal-Ispettaklu Flimkien mal-co-host Luca Di Lorenzo, il-grupp għen biex tinbena l-atmosfera u titla’ l-enerġija qabel il-ftuħ tal-ispettaklu.
Imma mbagħad wasal il-mument li vera kellkom toqogħdu attenti għalih. Hekk kif il-ftuħ ħa atmosfera ta’ festa Maltija, il-mużiċisti tal-Guggen dehru bl-istrumenti mdawlin li saru parti mill-identità viżiva tagħhom. U hemm, imdawra biċ-ċirku tal-istrumenti tar-ram, kien hemm il-kantanta Gaia. Dawl. Brass. Kulur. Mużika. Żgħażagħ Maltin. F’dak il-mument, din ma kinitx sempliċement band iddoqq fl-isfond. Kienet parti mill-ispettaklu. U jekk rajt il-ftuħ tal-Junior Eurovision mingħajr ma kont taf min huma, jista’ jkun li rajt lill-BFGM mingħajr lanqas biss indunajt! Imma... Minn Fejn Ġew? Hawnhekk l-istorja ssir aktar interessanti. Għax il-BFGM mhuwiex grupp ġdid li nħoloq għall-Junior Eurovision. Il-band ilha għaddejja mill-2008. Tul is-snin, il-grupp kompla jikber kemm fil-livell tal-produzzjoni tiegħu kif ukoll fin-numru ta’ membri, u llum jiġbor fih aktar minn 50 parteċipant.
Iżda l-istorja tagħhom lanqas ma tieqaf Malta. Skont il-band, tul is-snin il-grupp siefer barra minn Malta għal 22 tour internazzjonali, bl-aktar wieħed riċenti jwassalhom lejn il-Bulgarija. Fost l-esperjenzi internazzjonali tagħhom insibu wkoll dehriet fil-Ġermanja u f’Dubai, UAE, fejn il-grupp kellu l-opportunità juri dan l-istil Malti ta’ Guggen lil udjenzi lil hinn minn xtutna. Mhux ħażin għal band li forsi sal-Junior Eurovision... lanqas kont taf biha!
Allura... X’Imiss? Naturalment, ma stajniex nieqfu hemm. Għamilna kuntatt mal-band u staqsejnihom il-mistoqsija ovvja: “U issa x’ġej?” It-tweġiba? Ma qalulniex kollox... imma tawna ħjiel żgħir. Jidher li preparaw kalendarju festiv mimli attivitajiet u dehriet għal dawk kollha li jridu jesperjenzaw il-Guggen mill-qrib. Fejn se jkunu? Dik forsi aħjar inħalluha bħala sorpriża. Imma minn issa ’l quddiem, meta tisimgħu l-brass, tħossu r-ritmu tal-perkussjoni u taraw dawk l-istrumenti mdawlin resqin lejkom... agħtu t-tieni ħarsa. Għax wara li kienu parti mill-ftuħ tal-Junior Eurovision, jidher li Big Friends Guggen Musik Malta se jkunu ħafna aktar diffiċli biex ma tindunawx bihom! U jekk kont wieħed minn dawk li nnutajthom waqt l-ispettaklu? Issa taf min kienu.
Facebook / Big Friends Guggen Musik Malta AD 2008, 1st Maltese Guggen National Band.
