Id-dramm rinomat The Deep Blue Sea ta’ Terence Rattigan se jingħata ħajja ġdida bil-Malti permezz tal-produzzjoni Il-Baħar Ikħal Skur, taħt id-direzzjoni ta’ Tyrone Grima, b’Sharon Bezzina fil-parti ewlenija ta’ Hester Collyer. Dan ix-xogħol, li ġie tradott għall-Malti mill-awtur Immanuel Mifsud, jesplora temi profondi bħall-imħabba, id-dipendenza emozzjonali, is-solitudni u l-ġlieda bejn dak li verament nixtiequ mill-ħajja u dak li s-soċjetà tistenna minna.
L-istorja ddur madwar Hester Collyer, mara li ssib ruħha maqbuda bejn żewġ irġiel u żewġ realtajiet differenti. Wara li titlaq lil żewġha, l-imħallef rispettat William Collyer, biex tibda relazzjoni ma’ Freddie Page, eks pilota tar-Royal Air Force, Hester tiskopri li l-passjoni mhux dejjem tkun biżżejjed biex relazzjoni tirnexxi. Filwaqt li William joffrilha stabbiltà u sigurtà, Freddie ma jirnexxilux jirreċiproka l-intensità tas-sentimenti tagħha.
Għalkemm id-dramm oriġinali ttella’ għall-ewwel darba fl-1952, it-temi tiegħu għadhom rilevanti sal-lum. Din il-produzzjoni Maltija tittrasporta l-azzjoni lejn l-aħħar tas-snin sittin, perjodu ta’ bidliet soċjali importanti, meta l-attitudnijiet lejn in-nisa u gruppi minoritarji kienu qed jibdew jinbidlu, minkejja li diversi preġudizzji kienu għadhom preżenti.
Id-direttur Tyrone Grima jispjega li wieħed mill-elementi ewlenin tal-produzzjoni huwa d-distakk bejn dak li tippermetti l-liġi u dak li s-soċjetà fil-fatt taċċetta. Dan joħloq riflessjoni dwar kif, minkejja l-progress li sar matul is-snin, ċerti ġudizzji u aspettattivi soċjali għadhom jinfluwenzaw il-ħajja tan-nies. Il-kast jinkludi lil Sharon Bezzina bħala Hester Collyer, Carlos Farrugia bħala Freddie Page u Joseph Paul Vella bħala William Collyer. Magħhom se jieħdu sehem André Mangion, Lilian Pace Vassallo, Juan Grima, Robyn Vella u Joseph Fenech.
Il-Baħar Ikħal Skur se tittella’ fit-Teatru ta’ Spazju Kreattiv bejn it-30 ta’ Ottubru u t-8 ta’ Novembru, bħala parti mill-programm tal-istaġun 2026–2027 ta’ Spazju Kreattiv, bl-appoġġ tal-Kunsill Malti għall-Arti. Produzzjoni li twiegħed esperjenza teatrali intensa u emozzjonanti, filwaqt li tistieden lill-udjenza tirrifletti fuq l-imħabba, il-ġudizzju tas-soċjetà u l-kuraġġ li wieħed jagħżel it-triq tiegħu.
Għal aktar informazzjoni u biljetti, wieħed jista’ jżur is-sit uffiċjali ta’ Spazju Kreattiv. Ta’ min jinnota li l-produzzjoni tittratta temi sensittivi, fosthom is-suwiċidju u t-tbatija psikoloġika.
