Il-Kunsill Lokali tan-Nadur għadu kif wassal ringrazzjament sinċier lil Peter Muscat, magħruf bħala Tal-Laqxa, li sena wara sena jkompli jagħti kontribut volontarju imprezzabbli lill-lokalità permezz tal-ħolqien ta’ maskaruni tal-Karnival bi stil tradizzjonali.
Il-Karnival tan-Nadur huwa wieħed mill-aktar avvenimenti mistennija fil-kalendarju kulturali Għawdxi, magħruf għall-atmosfera unika, il-kreattività u l-ispirtu komunitarju li jiġbor flimkien residenti u viżitaturi. Il-maskaruni tradizzjonali huma parti essenzjali minn din iċ-ċelebrazzjoni u x-xogħol artistiku ta’ Peter jgħin biex din it-tradizzjoni tinżamm ħajja.
Il-Kunsill faħħar mhux biss it-talent artistiku tiegħu, iżda wkoll id-dedikazzjoni u l-ġenerożità li bihom dejjem ikun lest jagħti sehmu mingħajr ebda interess personali. Permezz tal-impenn tiegħu, il-Karnival tan-Nadur ikompli jissaħħaħ u jżomm il-karattru awtentiku li jagħmlu tant speċjali.
F’isem il-komunità kollha, il-Kunsill Lokali tan-Nadur irringrazzja lil Peter tal-kontribut kontinwu tiegħu u awguralu li jkompli jżomm ħajja din it-tradizzjoni sabiħa li tgħaqqad il-poplu Malti u Għawdxi flimkien.
Facebook/ Nadur Local Council
