Ftit taż-żmien ilu, il-Malta Records ġew mistiedna f’residenza privata f’Birkirkara sabiex jippreżentaw rekord nazzjonali ġdid fil-gżejjer Maltin:wieħed li jgħaqqad it-tradizzjoni Maltija tal-Milied ma’ storja familjari tassew unika.
Ir-rekord ġie stabbilit għall-akbar presepju tradizzjonali Malti li jirraffigura familja tipika Maltija. Dan il-presepju jkejjel 1.54 metri wiesa’, 1.03 metri fond u 1.18 metri għoli. Il-presepju jinkludi 10 personaġġi differenti u 12-il oġġett, kollha b’dimensjonijiet li jvarjaw bejn 25 u 40 ċentimetru.
Dak li jagħmel dan il-presepju tassew speċjali huwa li l-personaġġi mhumiex figuri ġeneriċi, iżda jirrappreżentaw lill-familja ta’ Brian Cilia stess: inkluż huwa nnifsu. Figura li tispikka b’mod partikolari hija dik tal-poeta nazzjonali Dun Karm Psaila, li huwa qarib ta’ Brian. Dan iżid valur storiku u kulturali qawwi ma’ dan il-proġett uniku.
Ta’ min jinnota li l-personaġġi kollha ġew maħluqa u miżbugħa bl-idejn minn Brian stess. Dan ix-xogħol artistiku jirrifletti sigħat ta’ dedikazzjoni, paċenzja u mħabba kbira lejn it-tradizzjoni Maltija tal-presepju. Illum, dan il-presepju jinsab esibit fir-residenza privata tiegħu f’Birkirkara, fejn jibqa’ jfakkar fil-valur tal-familja, il-wirt kulturali u l-arti Maltija.
Dan il-presepju huwa xhieda ta’ xogħol tassew straordinarju u f’isem Gwida mt ninsabu kburin li nistgħu nxerrdu magħkom dan it-talent Malti.
Facebook/ The Malta Records
