Dawk li għandhom Tallinja Card personalizzata u jkunu ilhom sena sħiħa ma jużawha għandhom joqogħdu attenti, hekk kif Malta Public Transport aġġornat it-termini u l-kundizzjonijiet tagħha u introduċiet il-possibbiltà ta’ tariffa ta’ €5 għal karti inattivi. Skont it-termini riveduti, jekk Tallinja Card personalizzata ma tkunx intużat jew sarilha top-up għal mill-inqas 365 jum konsekuttiv, din tista’ titqies bħala inattiva.
Jekk il-karta tibqa’ f’dan l-istat, Malta Public Transport tista’ timponi tariffa ta’ inattività ta’ €5. Fil-każ li jkun għad hemm bilanċ pożittiv fuq il-karta, il-kumpanija se tipprova tikkuntattja lid-detentur sabiex tħeġġu juża l-karta jew jagħmel top-up qabel tittieħed azzjoni ulterjuri.
Malta Public Transport spjegat li t-termini u l-kundizzjonijiet ġew organizzati mill-ġdid sabiex ikunu aktar ċari u faċli biex jinftiehmu. Il-biċċa l-kbira tal-informazzjoni issa qed tiġi ppreżentata f’format ta’ mistoqsijiet u tweġibiet. It-termini jinkludu wkoll informazzjoni dwar it-tipi differenti ta’ Tallinja Cards personalizzati u mhux personalizzati, min huwa eliġibbli għalihom, l-iskadenza tagħhom, l-applikazzjonijiet, it-top-ups, il-verifika tal-bilanċ, ir-rifużjonijiet u l-ispezzjonijiet abbord.
Skont Malta Public Transport, madwar 75% tar-residenti f’Malta għandhom Tallinja Card personalizzata, b’aktar minn 296,000 card attiva. Aktar minn 80% tal-passiġġieri jużaw dawn il-karti għall-vjaġġi tagħhom bil-karozza tal-linja. Matul l-2025 ġew irreġistrati 82 miljun vjaġġ tal-passiġġieri, żieda ta’ 9.6% meta mqabbla mal-2024. Minn dawn, madwar disa’ miljun vjaġġ saru permezz ta’ Tallinja Cards mhux personalizzati.
Għalhekk, jekk għandek Tallinja Card li ilha ma tintuża għal xi żmien, tajjeb li tiċċekkja kemm ilha inattiva sabiex tevita l-possibbiltà li tiġi ċċarġjat din it-tariffa.
Facebook / Tallinja
