Storja mhux tas-soltu ta’ żewġt irġiel Brażiljani reġgħet qed idur fuq il-midja soċjali. Melqui Ferraz u Denisson Santos iltaqgħu meta t-tnejn kienu seminaristi u kienu qed jitħejjew għal ħajja fis-saċerdozju Kattoliku iżda l-ħajja kellha pjan differenti għalihom. Dak li beda bħala ħbiberija bejn it-tnejn, maż-żmien żviluppa f’relazzjoni romantika, u Melqui aktar tard tkellem pubblikament dwar il-kunflitt li esperjenzaw bejn il-vokazzjoni reliġjuża tagħhom u s-sentimenti li kellhom lejn xulxin.
Skont dak li rrakkonta Melqui, meta r-rabta bejniethom bdiet tiġbed l-attenzjoni tas-superjuri tagħhom, it-tnejn intbagħtu fi bliet differenti. Huwa sostna wkoll li ngħataw il-possibbiltà li jkomplu bil-formazzjoni reliġjuża tagħhom sakemm ir-relazzjoni tibqa’ diskreta.
Iżda minflok komplew jaħbu r-relazzjoni tagħhom, Melqui u Denisson għażlu triq kompletament differenti u eventwalment it-tnejn telqu mis-seminarju. “Jekk għax inħobbok u ngħix miegħek jingħalqu dawk il-bibien, ħa jingħalqu elf oħra,” kien kiteb Melqui meta l-istorja tagħhom ġibdet attenzjoni kbira fil-Brażil.
Minn hemmhekk, it-tnejn bdew jgħixu r-relazzjoni tagħhom fil-miftuħ u jaqsmu partijiet minn ħajjithom flimkien fuq il-midja soċjali. Importanti jiġi ċċarat li Melqui u Denisson ma kinux saċerdoti ordnati, iżda seminaristi li kienu għaddejjin mill-formazzjoni biex eventwalment jidħlu għas-saċerdozju.
L-istorja tagħhom reġgħet qed tiġbed l-attenzjoni fuq il-midja soċjali, b’ħafna jiddiskutu temi bħall-imħabba, il-fidi, il-vokazzjoni u d-deċiżjonijiet li kapaċi jbiddlu kompletament it-triq li persuna tkun ħasbet li se tieħu f’ħajjitha. Għal Melqui u Denisson, triq li bdiet bil-ħsieb li jiddedikaw ħajjithom għas-saċerdozju spiċċat wasslithom biex jagħżlu li jibnu ħajja flimkien.
