Il-qasam tal-ospitalità Maltija jinsab f’luttu wara t-tħabbira tal-mewt ta’ Benny, magħruf ma’ ħafna bħala “Nonno”, il-moħħ u l-qalb wara La Buona Trattoria del Nonno, Ta’ Marija Restaurant u Palazzo Pescatore.
Fi stqarrija emozzjonanti maqsuma mill-familja u t-tim tiegħu, Benny ġie mfakkar bħala raġel li mhux biss bena ristoranti ta’ suċċess, iżda ħoloq esperjenzi, memorji u relazzjonijiet li ħallew impatt fuq ġenerazzjonijiet sħaħ ta’ Maltin u turisti.
“Nonno kien ħafna aktar minn ristoratier. Kien viżjonarju, pijunier tal-ospitalità f’Malta u persuna akbar mill-ħajja nnifisha,” qalet il-familja fil-messaġġ tagħha.
Matul is-snin, Benny bena reputazzjoni bbażata fuq il-ġenerożità, il-passjoni lejn l-ikel u l-imħabba lejn in-nies. Il-kariżma tiegħu u l-preżenza distintiva tiegħu għamluh figura magħrufa sew kemm fost il-klijenti kif ukoll fost dawk li ħadmu miegħu.
Il-familja qalet li l-ispirtu tiegħu se jibqa’ jgħix permezz tal-postijiet li tant kien iħobb u li fihom investa qalbu u ħajtu kuljum. Il-familja esprimiet ukoll il-gratitudni tagħha lejn it-tobba, l-infermiera u l-carers kollha li tawh kura u appoġġ matul dawn l-aħħar snin, b’mod partikolari Hospice Malta, SAMOC u SVDP Palliative Care.
Il-funeral se jsir nhar il-Ħamis 28 ta’ Mejju fit-8:00 fil-Knisja tal-Madonna tad-Duluri, segwit bid-difna fiċ-ċimiterju ta’ Burmarrad. Wara, se ssir wake biex tiġi ċċelebrata ħajtu ġewwa La Buona Trattoria del Nonno mill-11:00 ’il quddiem.
Minflok fjuri, il-familja qed titlob sabiex min jixtieq jagħmel donazzjoni lil Hospice Malta.
’mod simboliku u emozzjonanti, il-familja semmiet ukoll kif Benny rnexxielu jara lit-tim favorit tiegħu, Arsenal F.C., jerġa’ jsir champion wara 22 sena jistenna dak il-mument, “qabel telaq bħala champion hu wkoll.”
