Il-festival DoSEL fetaħ uffiċjalment f’Malta b’ċerimonja speċjali li saret fit-Teatru Manoel il-Ħamis 16 ta’ April. Dan il-festival jifforma parti mill-proġett Ewropew Drama of Smaller European Languages (DoSEL), inizjattiva li qed tinġieb Malta minn Teatru Malta flimkien mal-Aġenzija Nazzjonali għall-Arti Performattiva (NAPA).
Il-proġett jiġbor flimkien artisti, kittieba, tradutturi u professjonisti tat-teatru minn diversi pajjiżi Ewropej, b’enfasi fuq lingwi iżgħar li spiss ma jingħatawx l-attenzjoni li jistħoqqilhom. Il-programm jinkludi produzzjonijiet minn Malta, is-Slovenja, il-Kroazja u l-Estonja, kollha ppreżentati bil-lingwa oriġinali tagħhom b’surtitli bl-Ingliż.
Apparti l-wirjiet, il-festival qed joffri wkoll spazju għal diskussjoni u riflessjoni, permezz ta’ workshops u laqgħat professjonali li jindirizzaw temi bħat-traduzzjoni, id-dramaturġija u r-rwol tal-lingwa fit-teatru kontemporanju.
Waqt iċ-ċerimonja tal-ftuħ, id-Direttur Artistiku ta’ Teatru Malta, Sean Buhagiar, saħaq fuq l-importanza li lingwi iżgħar jitqiegħdu fiċ-ċentru tad-diskors kulturali Ewropew, u qal li dawn il-lingwi huma ħajjin u kapaċi jwasslu l-esperjenza umana fil-kumplessità kollha tagħha.
Min-naħa tiegħu, iċ-Chairman Eżekuttiv tal-Kunsill Malti għall-Arti, Luke Dalli, enfasizza li d-diversità lingwistika fl-Ewropa mhijiex ostaklu, iżda valur li jkompli jsaħħaħ il-kultura Ewropea.
Il-festival fetaħ bil-produzzjoni Ir-Rebħa tal-Ħuta li Ttir ta’ Carmel Aquilina – xogħol li qatt ma ttella’ qabel u li issa qed jingħata ħajja fuq il-palk. Din l-għażla tkompli turi l-impenn tal-festival lejn il-lingwa bħala mezz artistiku u espressjoni tal-identità.
Din l-edizzjoni tal-DoSEL Malta Showcase għandha wkoll tifsira speċjali għal Teatru Malta, hekk kif qed tiġi organizzata fl-istess sena tal-għaxar anniversarju tiegħu. Il-festival jikkonferma l-impenn tal-kumpanija li toħloq spazji fejn il-lingwi – Maltija u oħrajn Ewropej – jistgħu jiltaqgħu u jiżviluppaw permezz tat-teatru.
Fil-jiem li ġejjin, il-pubbliku se jkollu l-opportunità mhux biss jattendi produzzjonijiet minn pajjiżi differenti, iżda wkoll jieħu sehem f’djalogu dwar il-futur tat-teatru Ewropew u r-rwol tal-lingwi fih.
Il-programm jibqa’ għaddej b’attivitajiet miftuħa għall-pubbliku, u joffri pjattaforma fejn il-lingwi mhux biss jinstemgħu, iżda jgħixu fuq il-palk.
