Malta kisbet suċċess doppju fix-xena internazzjonali tal-konkorsi tas-sbuħija hekk kif Kirstin Abrook u Hayley Fenech Ghiller ġew inkurunati b’żewġ titli prestiġjużi waqt il-finali tal-konkors Mrs Globe 2026, li saru f’Ateni, il-Greċja.
Kirstin Abrook rebħet it-titlu ta’ Mrs Eurasia Petite 2026, filwaqt li Hayley Fenech Ghiller kisbet it-titlu ta’ Mrs European Nations Petite 2026. Din is-sena, il-kompetizzjoni rat bidla minn Mrs European Nations għal Mrs Eurasia, biż-żewġ titli fil-kategorija Petite jintrebħu minn rappreżentanti Maltin.
Hayley Fenech Ghiller, li għandha 25 sena, ilha tipparteċipa f’konkorsi tas-sbuħija minn meta kellha biss 12-il sena. Minbarra t-titlu tagħha, hija ngħatat ukoll il-WIN Ambassador Award bħala rikonoxximent għall-ħidma tagħha fil-ġbir ta’ fondi u l-impenn tagħha favur kawżi soċjali. Hayley issa mistennija tirrappreżenta lil Malta fil-finali mondjali ta’ Mrs Globe, li se jsiru f’Kalifornja f’Ġunju tal-2027.
Min-naħa tagħha, Kirstin Abrook, li twieldet Malta iżda trabbiet fl-Awstralja, hija edukatriċi, intraprenditriċi u speċjalista avvanzata fil-qasam tal-estetika. Fl-2018, hija waqqfet Kirstin Skin Clinic f’Malta u matul il-kompetizzjoni ngħatat ukoll l-Optimist Award għall-kontribut tagħha f’diversi inizjattivi ta’ karità.
Iż-żewġ Maltin ipparteċipaw taħt il-gwida ta’ Hannelie van Wyk, id-Direttriċi Nazzjonali ta’ Mrs Malta Globe, li kellha rwol importanti fit-tħejjija tagħhom għal din l-esperjenza internazzjonali. Dan is-suċċess ikompli jsaħħaħ ir-reputazzjoni ta’ Malta fil-konkorsi internazzjonali tas-sbuħija u juri li pajjiżna, minkejja ċ-ċokon tiegħu, kapaċi jikseb riżultati mill-isbaħ fuq livell internazzjonali.
Prosit mill-qalb lil Kirstin u Hayley għal dan is-suċċess doppju! Nawgurawlhom aktar kisbiet fil-futur!
Facebook / Hannelie Van Wyk
