Storja li dehret fuq il-midja soċjali ta’ Ben Camille qanqlet mistoqsija interessanti fost dawk li għal snin twal kienu jsegwu l-programm tant maħbub Tista’ Tkun Int! Fir-ritratt li qasam Ben, narawh flimkien ma’ Martina Zammit, Rachel Vella u Colin Aquilina, f’laqgħa li ġabet magħha mistoqsija waħda, tgħid wasal iż-żmien li jerġa’ jirritorna Tista’ Tkun Int?
Għal diversi snin, dan il-programm kien ferm aktar minn sempliċi programm televiżiv. Kien spazju fejn stejjer umani ngħataw vuċi, fejn familji li kienu ilhom mifrudin reġgħu sabu lil xulxin u fejn persuni li kienu għaddejjin minn ċirkostanzi diffiċli sabu l-għajnuna, l-appoġġ u xi kultant anke tama ġdida.
Tista’ Tkun Int! irnexxielu jmiss il-qlub ta’ ħafna Maltin u Għawdxin, mhux biss permezz tal-mumenti emozzjonanti li kien iwassal fuq l-iskrin, iżda wkoll billi tefa’ dawl fuq realtajiet li ħafna drabi jibqgħu moħbija fis-soċjetà tagħna. Kien programm li, minkejja l-istejjer diffiċli li kien jittratta, kien iħalli sens ta’ pożittività u solidarjetà. Fuq kollox, fakkarna kemm ġest żgħir, kelma ta’ kuraġġ jew id ta’ għajnuna jistgħu jagħmlu differenza enormi fil-ħajja ta’ persuna.
Għalkemm għalissa m’hemm l-ebda konferma dwar ritorn uffiċjali tal-programm, il-mistoqsija mqajma fuq il-midja soċjali żgur li tiftaħ diskussjoni interessanti. F’xenarju televiżiv li nbidel mhux ftit matul is-snin, għad hemm post għal programm bħal Tista’ Tkun Int! U aktar minn hekk, jista’ jkun li llum għandna bżonn programm bħal dan aktar minn qatt qabel?
Intom x’taħsbu? Tixtiequ taraw lil Tista’ Tkun Int! jirritorna fuq it-televiżjoni Maltija?
