Ixxerja

Inkuraġġuti ħafna mir-rikonoxximent li kisbet l-ewwel serje animata Karamellu tar-Raħal t’Isfel, li rebħet il
Premju Proprjetà Intellettwali għall-Inizjattiva Kreattiva għas-sena 2025 li ingħata mid-Dipartiment tal
Kummerċ, kif ukoll mill-popolarità li s-serje qed tgawdi fost it-telespettaturi, Nannu Karm Productions u
Toontuloon Animation Studio qed iniedu t-tieni serje ta’ għaxar episodji.

Is-serje animata l-ġdida tkompli tieħu lit-telespettaturi fuq vjaġġ nostalġiku lejn il-ħajja Maltija tas-snin
Ħamsin (1950-1959), billi tagħti ħajja lill-memorji mill-iktar ħelwin ta’ tifel żgħir jismu Karamellu.

Miktuba minn Charles Buttigieg (In-Nannu Karm), is-serje hija mnebbħa minn esperjenzi li kellu l-awtur fi
tfulitu, fi żmien meta kien għadu possibbli li t-tfal joħorġu jilagħbu fit-toroq għax karozzi kien hawn ftit.
“Karamellu bħala tali ma kienx jeżisti,” qal is-Sur Buttigieg.

“Huwa isem li ivvintajt jien. Biss bħala tifel Karamellu jirrappreżenta lili; dak li għaddejt minnu u ltqajt miegħu jien fis-snin ta’ żmien l-iskola primarja. Semmejtu Karamellu tar-Raħal t’Isfel għax jien twelidt iż-Żejtun, li għandu żewġ partijiet – ir-Raħal ta’ Fuq u r-Raħal t’Isfel, bil-knisja parrokkjali fin-nofs. L-istejjer ta’ Karamellu spiss huma ispirati minn esperjenzi personali jew esperjenzi ma’ nies li jien kont midħla tagħhom fi tfuliti. Bnejt fuq il-karattru tagħhom, kif kont nafu u napprezzah jien.”

Is-serje l-ġdida, li tkompli tiċċelebra temi universali tal-familja, il-ħbiberija, u l-esperjenzi tat-tfulija, li
jgħixuhom in-nies ta’ kull età, se tibda tixxandar nhar it-Tnejn 8 ta’ Ġunju fil-16:45 fuq ONE, b’ripetizzjonijiet matul il-ġimgħa.

B’animazzjoni bis-saħħa ta’ teknika mill-iżjed moderna, l-istejjer huma maħsubin ukoll biex ikomplu jferrħu lit-tfal u jnisslu spirtu nostalġiku fost il-kbar.

Il-proġett huwa mgħejjun mill-Kunsill Malti għall-Arti u sponsorjat miċ-Ċentru tal-Ilsien Malti (ĊIM), Melita Foundation, Strand Palace Agencies (Sizzzlers & Twistees), Erremme Business Advisors, Country Terrace Restaurant (Gozo), Tristar Travel, Book Distributors Ltd (BDL), u District 5 Restaurant (Birżebbuġa).
Tagħrif addizzjonali:

• Titlu tas-Serje: Karamellu tar-Raħal t’Isfel
• Studio: Nannu Karm Productions u Toontuloon Animation Studio
• Data tat-Tnedija: It-Tnejn 8 ta’ Ġunju fil-16:45 fuq ONE
• Ripetizzjonijiet: Jixxandru episodji matul il-ġimgħa
  Tista’ ssegwi l-vjaġġ ta’ Karamellu tar-Raħal t’Isfel fuq:
• Facebook: Karamellu tar-Raħal f’isfel Facebook
• Sit Elettroniku: nannukarm.org
  Dwar mistoqsijiet tal-media, intervisti, jew aktar tagħrif, jekk jogħġbok ikkuntattja:
  production@nannukarm.org

Ixxerja

Miktub Minn

Kyle Zarb

Interessat ħafna f'dak kollu li hu relatat mal-midja u x-xandir. Nistgħu ngħidu li hu ffissat fid-dinja tal-ispettaklu; kemm dik lokali kif ukoll internazzjonali. Isegwi d-drama Maltija ta' kull ġeneru u tassew japprezza t-talent Malti. Għandu esperjenza fejn jidħol kant, kif ukoll animazzjoni għat-tfal. Hu jħoss sodisfazzjon kbir meta jferraħ lil ħaddieħor u tkun xi tkun iċ-ċirkostanza jipprova dejjem iżomm tbissima fuq fommu.

TV

Liema Minn Dawn Il-Produzzjonijiet Popolari Tixtieq Terġa Tara Fuq L-Istazzjon Nazzjonali?

Kyle Zarb Illum

Bil-wasla tas-sajf, ħafna telespettaturi Maltin jibdew iħossu n-nuqqas tal-iskeda televiżiva li jkunu draw isegwu. Bosta programmi jkollhom waqfa sa Settembru, fejn terġa’ tibda skeda oħra. Proprju għalhekk, il-paġna uffiċjali ta’ TVM staqsiet mistoqsija li qanqlet nostalġija u diskussjoni fost il-pubbliku: “Liema programmi tixtieq terġa’ tara?” Bosta kkummentaw u semmew diversi programmi li ħallew impatt fuq […]