Ixxerja

Aaron Zahra ħabbar li temm il-ħidma tiegħu fl-Uffiċċju tal-Prim Ministru wara snin iservi bħala Kap tal-Attivitajiet tal-Gvern f'Kastilja. F'post emozzjonanti fuq il-midja soċjali, Zahra ddeskriva dan il-kapitlu bħala wieħed mimli esperjenzi, sfidi u mumenti li qal se jibqa' jgħożż għal dejjem, filwaqt li ammetta li d-deċiżjoni ma kinitx waħda faċli.

"Kull bidu, fih it-tmiem. Wara snin ta’ esperjenzi, sfidi u mumenti li se nibqa’ ngħożż, illum intemm il-ħidma tiegħi f’Kastilja," kiteb. Huwa spjega li matul is-snin tiegħu fl-Uffiċċju tal-Prim Ministru kien responsabbli mill-organizzazzjoni tal-attivitajiet kollha li fihom kien jipparteċipa l-Prim Ministru, filwaqt li akkumpanjah f'avvenimenti madwar Malta u kellu l-opportunità jsegwi mill-qrib il-ħidma tiegħu man-nies.

Zahra fakkar ukoll li kien wieħed minn dawk li ħadmu mill-qrib biex fl-2020 Dr Robert Abela jsir Mexxej tal-Partit Laburista u eventwalment Prim Ministru. Wara dik ir-rebħa, ingħata l-fiduċja li jokkupa l-kariga ta' Kap tal-Attivitajiet tal-Gvern.

Fost il-mumenti li semma b'kburija kien hemm iż-żjara tal-Papa Franġisku f'Malta fl-2022, summit internazzjonali li laqqa' f'Malta għaxar Presidenti u Prim Ministri fl-2023, il-ħatra tal-President tar-Repubblika, iż-żewġ ħatriet tal-Prim Ministru u diversi anniversarji ta' festi nazzjonali. Huwa qal ukoll li kien parti minn tliet rebħiet elettorali importanti, fosthom iż-żewġ Elezzjonijiet Ġenerali u l-elezzjoni tal-Parlament Ewropew tal-2024.

Fil-messaġġ tiegħu, Zahra enfasizza li dejjem ta importanza kbira lill-kontabilità u t-trasparenza fil-mod kif tmexxiet il-ħidma tiegħu, filwaqt li assigura li l-flus pubbliċi dejjem intużaw b'mod responsabbli. Madankollu, ammetta li x-xogħol kien jinvolvi sagrifiċċji kbar, b'mod partikolari l-ħin li qatta' 'l bogħod mill-familja tiegħu.

Fi tmiem il-messaġġ, huwa rringrazzja lill-Prim Ministru Robert Abela, lil martu Lydia u lill-familja tagħhom tal-fiduċja li poġġew fih matul dawn is-snin, kif ukoll lil kull min apprezza x-xogħol tiegħu. "Idejja fuq qalbi, kuntent u kburi bix-xogħol li wettaqt... Kburi b’dak kollu li għamilt. Minn qalbi, grazzi," temm jgħid, filwaqt li sostna li issa jħares 'il quddiem b'ottimiżmu lejn opportunitajiet ġodda.

Ixxerja

Miktub Minn

Emil Calleja Bayliss

Iħobb il-lingwa Maltija u jsegwi b’mod attiv ix-xena mużikali lokali. Id-dinja tal-ispettaklu taffaxxinah u l-għaxqa tiegħu jara xows differenti. Biex jirrilassa Emil jieħu gost imur ħdejn il-baħar u fil-kampanja, hemm isib ftit kwiet ’il bogħod mill-ġenn.

Issa

“Għal 35 Sena, Il-Fondazzjoni OASI, Baqgħet B’dedikazzjoni Toffri Sapport, Tama, U Ċans Ġdid” – Fondazzjoni OASI

Gabriella Borg Illum

Illum il-Fondazzjoni OASI qed tiċċelebra 35 sena minn meta twaqqfet. Din il-fondazzjoni toffri tama u appoġġ lil min ikun għaddej minn sfidi ta’ vizzji.Fuq il-paġna uffiċjali tagħhom kitbu, “Għal 35 sena, il-Fondazzjoni OASI, baqgħet b’dedikazzjoni toffri sapport, tama, u ċans ġdid lil dawn li qed jissieltu mal-vizzji u sfidi relatati. Wara kull storja ta’ persuna […]