Ix-xadina Ġappuniża Punch, li s-sena li għaddiet saret sensazzjoni madwar id-dinja wara li dehret tgħannaq orangutan, iċċelebrat l-ewwel sena ta’ ħajjitha fiż-Żoo ta’ Ichikawa City fil-Ġappun.
Punch twieldet sena ilu, iżda kienet abbandunata minn ommha ftit wara t-twelid. Il-kustodji taż-żoo rabbewha huma u tawha bħala ġugarell, orangutan biex jgħinha tiżviluppa l-istint li taqbad u titħaddan, ħila essenzjali għax-xadini fl-ewwel xhur ta’ ħajjithom.
F’Jannar, wara sitt xhur ta’ kura speċjali, Punch ingħaqdet mal-kumplament tal-grupp ta’ madwar 50 xadina. Għall-ewwel kienet issibha diffiċli taċċetta l-ambjent il-ġdid u kienet terġa’ tiġri lura lejn il-ġugarell tagħha kull darba li kienet tiġi mwarrba mix-xadini l-oħra. Dawk l-immaġnijiet messu l-qlub ta’ miljuni u għamluha virali madwar id-dinja.
Illum, Punch kibret sew, m’għadhiex tiddependi fuq l-orangutan u tqatta’ l-ġranet tilgħab, titla’ mas-siġar u tieħu ħsieb tagħha nnifisha flimkien max-xadini l-oħra. Għall-ewwel għeluq sninha, iż-żoo rċieva aktar minn 2,500 kartolina u messaġġi ta’ awguri minn ammiraturi minn madwar id-dinja. L-uffiċjali qalu li jinsabu grati li Punch waslet għal dan il-jum b’saħħitha u jittamaw li n-nies jibqgħu jsegwu l-vjaġġ tagħha b’tant imħabba.
Google/AP News
