Skont rapport ippubblikat fil-gazzetta Franċiża Le Parisien, il-leġġenda tal-mużika internazzjonali Céline Dion kienet tinsab f’Basel għall-finali tal-Eurovision Song Contest 2025.
Kien mistenni li l-kantanta Kanadiża, li hija wkoll rebbieħa tal-Eurovision fl-1988, tagħti wirja speċjali fuq il-palk tal-finali. Jidher li anke saru xi provi bil-moħbi biex id-dehra tagħha tibqa’ sorpriża għal kulħadd.
Iżda minkejja l-eċitament u l-preparazzjonijiet, Dion kellha tħassar il-prestazzjoni tagħha fl-aħħar minuta minħabba problemi ta’ saħħa. Din id-deċiżjoni waslet ftit sigħat biss qabel il-bidu tal-programm, li ħalliet lill-partitarji tagħha u lill-udjenza tal-Eurovision diżappuntati iżda fl-istess ħin imħassbin għaliha.
Céline Dion ilha tissielet ma’ sfidi ta’ saħħa f’dawn l-aħħar snin, u l-aħbar li ma setgħetx toħroġ fuq il-palk f’Basel qajmet mewġa ta’ simpatija fuq il-midja soċjali. Ħafna segwaċi esprimew ix-xewqa tagħhom li jarawha lura fil-palk meta tkun f’kundizzjoni aħjar.
Il-preżenza tagħha fil-finali kienet tkompli tikkonsolida r-rabta storika tagħha mal-Eurovision, iżda għalkemm il-wirja ma saritx, l-isem tagħha xorta kien wieħed mill-aktar imsemmija matul il-lejl.
Facebook / Celine Dion
