Permezz ta’ kitba fuq il-paġna tagħhom, Vuci ghall-Annimali qasmu mas-segwaċi tagħhom messaġġ importanti rigward ix-xiri tal-ġriewi.
Bdew billi qalu, “Ġriewi li qed jinbiegħu fil-pet shops għandhom iqajmu dubji serji. Meta ġriewi qed jinbiegħu minn pet shops mingħajr trasparenza dwar minn fejn ġew, min rabbiehom, kif qed jinżammu l-ġenituri tagħhom jew f’liema kundizzjonijiet trabbew… dan għandu jinkwieta lil kull min verament iħobb lill-annimali. Ebda ritratti tal-omm. Ebda informazzjoni dwar il-missier. Ebda trasparenza dwar il-kundizzjonijiet tat-trobbija. Ebda idea jekk il-klieb użati għat-tgħammir humiex qed ibatu wara bibien magħluqa.”
Żiedu, “Affarijiet li għandek toqgħod attent għalihom meta tixtri ġeru:
• Ġriewi mibjugħa minn pet shops b’ftit jew ebda informazzjoni dwar min rabbiehom
• L-ebda possibbiltà li tara lill-omm jew fejn trabba l-ġeru
• Nuqqas ta’ pedigree jew dokumentazzjoni uffiċjali
• Ġriewi ġejjin minn sorsi mhux magħrufa jew importati ta’ spiss
• Ħaddiema li ma jkunux jistgħu jwieġbu mistoqsijiet bażiċi dwar il-kundizzjonijiet tat-trobbija.”
Qalu wkoll, “Trobbija responsabbli għandha tpoġġi l-benesseri, is-soċjalizzazzjoni, is-saħħa u t-trasparenza l-ewwel! Sfortunatament, it-trobbija irresponsabbli u n-negozju tal-ġriewi għadhom għaddejjin filwaqt li Malta diġà qed taffaċċja kriżi ta’ popolazzjoni żejda ta’ annimali u s-santwarji jinsabu mimlijin. Qabel tixtri ġeru, staqsi il-mistoqsijiet. Jekk m’hemmx trasparenza, tixtrix! L-annimali huma ħlejjaq senzjenti, mhux merkanzija għall-bejgħ.”
