Il-makeup artist Malti Liam Lee Camilleri kompla jkabbar l-esperjenza tiegħu fix-xena internazzjonali tal-moda, hekk kif ivvjaġġa minn Malta lejn l-Italja biex jaħdem f’sitt fashion shows differenti waqt il-Milan Fashion Week 2026.
Camilleri għandu aktar minn sitt snin esperjenza fil-qasam tal-makeup għall-moda, editorjali u tiġijiet, u matul il-karriera tiegħu diġà kellu opportunitajiet jaħdem f’Malta, Londra u Pariġi. Din id-darba kien imiss lil Milan, waħda mill-aktar bliet importanti fid-dinja tal-moda.
Matul il-ġimgħa, Liam ingħaqad ma’ diversi timijiet internazzjonali tal-makeup, fosthom New York Makeup Academy, MBA – Making Beauty Academy u MKS Milano.
Huwa ta l-kontribut tiegħu f’sitt shows, fosthom dawk ta’ Linjin, B Iconic, Chen1988 Studio, Barbara Rizzi u Tell The Truth, kif ukoll fi proġetti oħra. Din l-esperjenza tatu wkoll l-opportunità jaħdem ma’ diversi key artists, fosthom Giulio Panciera, Sabina Pinsone u James MacInerney, magħruf ukoll għall-parteċipazzjoni tiegħu fil-programm Glow Up.
“Milan kienet esperjenza inkredibbli għaliex kull show ġab miegħu xi ħaġa differenti. Li nkun parti minn tim daqshekk divers u naħdem ma’ artisti b’talent inkredibbli kien wieħed mill-isbaħ aspetti għalija,” qal Camilleri. Huwa żied jgħid li kull show sfidah b’mod kreattiv u tah xi ħaġa ġdida x’jieħu lura miegħu mill-esperjenza.
Il-Milan Fashion Week kienet ukoll opportunità għal Liam biex ikompli jiżviluppa l-arti tiegħu, jibni kuntatti internazzjonali ġodda u jikseb aktar esperjenza fl-ambjent kreattiv u mgħaġġel li jkun hemm wara l-kwinti ta’ waħda mill-akbar ġimgħat tal-moda fl-Ewropa.
Liam Lee Camilleri huwa makeup artist ibbażat Malta u ċċertifikat internazzjonalment mill-VTCT. Ix-xogħol tiegħu jvarja minn fashion shows u editorjali għal campaigns u makeup għat-tiġijiet. Wara l-esperjenza tiegħu f’Milan, Liam issa qed iħares ’il quddiem lejn opportunitajiet ġodda u lejn dak li jista’ jġib miegħu l-istaġun li jmiss fil-karriera internazzjonali tiegħu.
