Il-Malta Eurovision Song Contest jerġa’ jġib flimkien taħlita varjata ta’ artisti stabbiliti u talent ġdid, b’kanzunetti li jvarjaw fil-ġeneru, l-istil u l-lingwa. L-edizzjoni ta’ din is-sena tispikka għall-kreattività, l-identità Maltija u stejjer personali qawwija, hekk kif il-parteċipanti jimmiraw li jikkonvinċu lill-ġurija u lill-pubbliku bil-ħoss u l-preżenza tagħhom fuq il-palk.

Is-semifinali se ssir nhar il-Ħamis, 15 ta’ Jannar, filwaqt li l-finali se tittella’ nhar is-Sibt, 17 ta’ Jannar. Minn 18-il parteċipant, 12 biss se jikkwalifikaw għall-finali. Hawnhekk qed nagħtukom l-opportunità li tiskopru aktar dwar l-artisti u l-kanzunetti li qed jikkompetu fis-semifinali ta’ din is-sena. Il-festival ta’ din is-sena se jkun preżentat minn Keane Cutajar, Destiny Chukunyere u Gaia Cauchi.

Franklin – Guide You Home

Miktuba minn Franklin Calleja u Cyprian Cassar.

Franklin Calleja sar magħruf fl-2012 wara li rebaħ Don’t Stop Me Now. Huwa kiseb riżultati b’saħħithom fil-Malta Eurovision Song Contest u kkollabora ma’ Alexander Rybak fuq il-kanzunetta Still Here. Lura fl-2016 spiċċa fit-tielet post bil-kanzunetta Little Love. Illum, ikompli jsaħħaħ il-karriera tiegħu b’apparizzjonijiet internazzjonali. Il-kanzunetta ta’ din is-sena tiegħu hija Guide You Home, l-ewwel kanzunetta bi kliem u mużika tiegħu stress.

Chess Galea – Shout It Out

Miktuba minn  Francesca Galea, Hannah Dorman, Niklas Rosström u Remy Borsboom

Chess Galea hija kantanta, awtriċi u mudella Maltija b’mużika mxandra fuq BBC Radio u stazzjonijiet internazzjonali. Ħadmet ma’ Jack Savoretti, Nintendo u Apink, u tellgħet xogħolha fil-UK House of Commons. Attivista għall-ugwaljanza u s-saħħa mentali, waqqfet The Kintsugi Way u hija vocal coach rinomata. Din l-ewwel darba li qed tipparteċipa f’dan il-konkors.

Liston – Mela

Miktuba minn Liston Bongailas u Daniel Borg.

Liston huwa artist Malti tal-hip-hop b’aktar minn 20 sena esperjenza fil-breaking, MCing u ħidma komunitarja. Huwa d-direttur ta’ Street Elements Malta, u kien finalista ta’ Malta’s Got Talent u Mużika Mużika. Hu magħruf għall-enerġija u l-identità Maltija fix-xogħol tiegħu. Dan se jkun id-debutt tiegħu f’din il-kompetizzjoni.

Kurt Anthony – On The Borderline

Miktuba minn Kelly Rose Moncado, Edward Abela u Biagio Joe Romano

Kurt Anthony huwa kantant, awtur u attur Malti bbażat bejn Malta u l-Italja. Ipparteċipa f’kompetizzjonijiet lokali u internazzjonali, inkluż fil-Malta Eurovision Song Contest u New Wave. Studja Musical Theatre f’Ruma u deher f’produzzjonijiet ewlenin, magħruf għall-versatilità u l-preżenza qawwija tiegħu fuq il-palk. Kurt kien involut ukoll fis-selezzjoni ta’ San Marino fil-passat u din hija t-tieni darba li qed jippreżenta kanzunetta fil-Malta Eurovision Song Contest.

Stefan Galea – Pose

Miktuba minn Ynke Dingenen, Tchiah Ommar, Owen Vos u Stefan Galea

Stefan huwa kantawtur tal-pop alternattiv b’stil teatrali u influwenzi Mediterranji. Tħarreġ fil-vuċi u fl-arti drammatika, ipparteċipa fil-Malta Junior Eurovision Song Contest, f’X Factor Malta u l-Malta Eurovision Song Contest. Bil-kanzunetti Escape u Lablab (Talk Talk), kompla jsaħħaħ identità artistika, identità kuraġġuża u oriġinali. Il-karriera tiegħu hija kkaratterizzata minn esperimentazzjoni mużikali u żvilupp gradwali ta’ stil personali fuq il-palk.

Ema – Achikuku (Don’t Think About It)

Miktuba minn Peter Borg, Matt BLXCK, Emil Calleja Bayliss u Ema Vella

Ema bdiet il-vjaġġ mużikali tagħha ta’ 12-il sena, meta bbukkjat waħedha l-ewwel lezzjoni tal-kant. Ipparteċipat f’kompetizzjonijiet lokali u internazzjonali, u kisbet rikonoxximent fuq il-palk. Il-pass deċiżiv wasal ma’ X Factor Malta bħala parti minn F.A.I.T.H. Wara bdiet karriera solo b’suċċess, inkluż bir-rilaxx tal-kanzunetti Luv u Emmint Fik. Is-sena li għaddiet preżentat il-kanzunetta Ħsibijiet b’kollaborazzjoni ma’ żewġ artisti oħra, li wasslithom sal-finali ta’ Mużika Mużika 2025.

Kelsy Attard – Perfectly Broken

Miktuba minn Melanie Wehbe, Rasmus Rex Wester Findinge, Sarah Bonnici u Kelsy Attard.

Kelsy Attard hija kantanta Maltija ta’ 18-il sena li bdiet lezzjonijiet tal-kant sa minn meta kellha 3 snin. Matul is-snin ipparteċipat f’diversi kompetizzjonijiet, fosthom rebħa fil-kategorija tagħha f’Music for Kids fir-Rumanija u waslet sas-Six Chair Challenge ta’ X Factor Malta 2023. Hi ħadet sehem fl-Eurovision Camp, fejn skopriet il-passjoni għall-kitba tal-kanzunetti. Hemmhekk kitbet Love Me Loud u sena wara Perfectly Broken li kompliet tiżviluppa l-identità artistika tagħha b’għan li tirrappreżenta lil Malta fil-futur.

Adria Twins – Nerġa’ Nqum

Miktuba minn Joe Julian Farrugia u Shaun Farrugia

Shaian u Celine Muscat, magħrufa bħala Adria Twins, huma żewġ kantanti ta’ 25 sena mill-Għargħur, magħrufa għall-istejjer emozzjonali fil-mużika tagħhom. Il-passjoni tagħhom bdiet ta’ tmien snin u ilhom jidhru flimkien minn dak iż-żmien. Wara t-telfa ta’ missierhom Adrian, ħadu l-isem Adria Twins f’ġieħu. Il-kanzunetta L-Isbah Stilla ġabitilhom rikonoxximent nazzjonali, filwaqt li Qalb Ma’ Qalb wasslithom sal-finali tal-MESC, kompliet turi l-potenzjal artistiku tagħhom.

Kelsie Borg – Let A Girl Breathe

Miktuba minn Linnea Gawell, Gusten Dahlqvist u Jean Paul Borg

Ta’ 19-il sena, Kelsie Borg diġà ddedikat aktar minn għaxar snin għall-mużika, wara li bdiet tkanta ta’ sitt snin. Matul is-snin ipparteċipat f’diversi kompetizzjonijiet lokali u internazzjonali. Pass importanti fil-karriera tagħha kien meta waslet sal-finali ta’ X Factor Malta tar-Raba’ Staġun. Din is-sena se tkun qed tagħmel id-debutt tagħha fil-Malta Eurovision Song Contest.

Matthew Cilia & The AfterParty – Brutality Mentality

Miktuba minn: Matthew Cilia, Linnea Gawell, David Depasquale, Daniel Dalli u Joshua Max Wunderlich

Matthew Cilia huwa kantant u awtur Malti magħruf għall-ħoss pop-rock enerġetiku. Beda bħala frontman ta’ diversi bands lokali, fejn żviluppa ħiliet live u preżenza qawwija fuq il-palk. Aktar tard nieda karriera solo, ipparteċipa f’festivals nazzjonali inkluż fil-Malta Eurovision, u kiseb rikonoxximent għall-vuċi qawwija. Bil-mużika tiegħu li tgħaqqad melodiji memorabbli u lirika emozzjonali, Matthew ikompli jsaħħaħ l-identità artistika tiegħu.

Matt BLXCK – Ejja Lejja Ħdejja ‘L Hawn (The Flute)

Miktuba minn MATT BLXCK, Audun Agnar u Matthew James

MATT BLXCK huwa artist kuraġġuż li jħallat ġeneri differenti, magħruf għall-persona teatrali u l-kreattività bla biża’ tiegħu. Jgħaqqad camp pop, elementi elettroniċi u influwenzi afro, u bena identità u viżiva unika. Kien fost il-favoriti tal-pubbliku fil-Malta Eurovision Song Contest, fejn impressjona bi prestazzjonijiet spettakolari. Lil hinn mill-MESC, ikompli jesperimenta, jikteb għal artisti lokali u internazzjonali, u jidħol f’fażi ġdida ta’ awtentiċità, espansjoni u skop artistiku.

Rhiannon Micallef – Hold Myself Up

Miktuba minn Rhiannon Micallef, Noah Timman, Kaya Campbell u Natalie Misova

Rhiannon hija kantawtriċi, fundatriċi ta’ razzett u konsulenta fil-qasam tal-pagamenti, li tgħaqqad l-arti man-negozju fil-komunità. Dehret fil-passat fuq il-palk tal-MESC, iżda issa qed tirritorna wara waqfa ta’ sitt snin, fejn kellha ċans biex tibni ruħha u l-karriera professjonali tagħha. Matul dan iż-żmien waqqfet Ta’ Lazzru Farm u saret konsulenta rinomata. Il-kanzunetta Hold Myself Up tirrifletti dan il-vjaġġ ta’ reżiljenza u twelid mill-ġdid, hekk kif tirritorna għall-MESC bħala artista matura u b’viżjoni ċara.

Mychael Bartolo Chircop – My Sweet Angel

Miktuba minn Mychael Bartolo Chircop, MATT BLXCK, Klinsmann Coleiro u Remy Borsboom

Mychael Bartolo Chircop huwa kantant żagħżugħ ta’ 18-il sena li beda jkanta ta’ sitt snin. Magħruf għall-espressività u t-teknika tiegħu, hu jdoqq ukoll il-pjanu u qed jesplora l-kitba tal-kanzunetti. Kiseb rikonoxximent lokali u internazzjonali, fosthom it-2 u t-3 post fil-Junior Eurovision. B’dixxiplina u mħabba kbira lejn il-mużika, Mychael ikompli jiżviluppa l-identità artistika tiegħu bħala vuċi ġdida u promettenti fix-xena mużikali Maltija. Dan hu d-debutt tiegħu fil-festival.

AIDAN – Bella

Miktuba minn Aidan Cassar, Joep Van Den Boom u Sarah Bonnici

AIDAN huwa wieħed mill-aktar artisti kontemporanji Maltin ta’ suċċess, b’14-il single li laħqu l-ewwel post. Magħruf għall-pop enerġetiku u l-prestazzjonijiet karizmatiċi tiegħu, huwa preżenza kostanti fuq il-palki u l-klassifiki lokali. Deher f’avvenimenti nazzjonali kbar, inkluż Lejlet l-Ewwel tas-Sena quddiem eluf. Fl-2024 u l-2025 mexxa u ppreżenta l-kunċerti tiegħu stess fl-MFCC quddiem aktar minn 10,000 fan, u jkompli jsaħħaħ l-influwenza tiegħu fix-xena pop Maltija. Fl-2022 hu spiċċa fit-tieni post permezz tal-kanzunetta Ritmu.

Denise – Trophy

Miktuba minn Marcus Winther-John, Linnea Deb, Denise Mercieca u Owen Vos

Denise hija artista li tkanta d-dark pop li tgħaqqad produzzjoni ispirata mis-snin 80 ma’ influwenzi moderni. Kisbet attenzjoni fl-2022 bil-kanzunetta BOY, li spiċċat fil- 5 tal-MESC u fil-klassifiki lokali. Fl-2023 irritornat b’Forget Me Not u MARA, kanzunetta b’narrattiva emozzjonali ispirata mill-esperjenza tagħha bħala omm żagħżugħa. Minkejja sfidi personali, Denise tkompli tibni identità artistika kuraġġuża, onesta u emozzjonalment qawwija.

Nathan Psaila – Ganador

Miktuba minn Nathan Psaila, Ynke Dingenen, Tchiah Ommar u Tobi Verheij

Nathan huwa kantawtur Malti li beda t-taħriġ vokali formali ta’ għaxar snin. Matul is-snin deher f’diversi programmi televiżivi u kompetizzjonijiet lokali u internazzjonali, fosthom l-Għanja tal-Poplu Żgħażagħ, The Entertainers u X Factor Malta. Hu għamel id-debutt tiegħu fil-MESC 2023 b’Creeping Walls u rritorna fil-finali tal-MESC fl-2024 u l-2025. Din is-sena se jikkompeti wkoll f’Mużika Mużika. Is-sena li għaddiet hu ħareġ is-singles So Good u Down, li daħlu mal-ewwel 10 fil-klassifika lokali.

Mark Anthony Bartolo – Mumenti Sbieħ

Miktuba minn Mark Anthony Bartolo, MATT BLXCK, Ronald Janeček u Silje Montsko Blandkjenn

Mark Anthony Bartolo huwa kantawtur, kitarrist u edukatur mużikali, magħruf għall-prestazzjonijiet emozzjonali u l-lirika sinċiera tiegħu. B’taħriġ fil-mużika klassika u kontemporanja, joħloq ħoss melodiku mmexxi mill-kitarra. Hu deher fuq pjattaformi ewlenin bħal X Factor Malta u l-Malta Eurovision Song Contest. Bħala għalliem, jaqsam l-esperjenza tiegħu mal-ġenerazzjonijiet futuri, filwaqt li l-mużika tiegħu tibqa’ mibnija fuq awtentiċità u emozzjoni.

Janice Mangion – Univers

Miktuba minn Cyprian Cassar, Mark Scicluna u Emil Calleja Bayliss

Janice Mangion hija artista li bdiet il-karriera tagħha fuq L-Isfida u dehret f’diversi festivals ewlenin, fosthom L-Għanja tal-Poplu, il-Konkors Kanzunetta Indipendenza, is-Summer Hit Song Contest, il-Malta Eurovision Song Contest u Mużika Mużika. Kisbet suċċess kbir bil-kanzunetta Kewkba, li waslet fit-tieni post fil-MESC tal-2017, u kienet l-ewwel kanzunetta bil-lingwa Maltija li ppruvat tirrappreżenta lil Malta wara snin twal. Minn dak iż-żmien ’l hawn irrappreżentat lil Malta barra minn xtutna b’suċċess u ħarġet diversi kanzunetti oriġinali.

B’din il-varjetà ta’ stili, esperjenzi u vuċijiet, il-Malta Eurovision Song Contest ta’ din is-sena jkompli jikkonferma l-ħajja u d-diversità tax-xena mużikali Maltija. Kull artist iġib miegħu storja u identità unika, u b’hekk il-kompetizzjoni twiegħed spettaklu ta’ livell għoli. Issa f’idejn il-ġurija u l-pubbliku biex jiddeċiedu liema kanzunetta jemmnu li għandha tirrappreżenta lil Malta fil-Eurovision.