F'jum li jġib miegħu ħafna emozzjonijiet, Adria Twins sellmu t-tifkira ta' missierhom permezz ta' messaġġ mill-qalb f'għeluq sninu, hekk kif illum kien ikun qed jiċċelebra għeluq sninu.
Fuq il-midja soċjali, huma kitbu, "Awguri f'għeluq sninek, Pa. Għalkemm jum bħal-lum huwa diffiċli ħafna mingħajrek, ifakkarna wkoll fil-memorji sbieħ li ħallejt warajk u fl-imħabba li tajtna."
Huma stqarrew kemm in-nuqqas tiegħu għadu jinħass kuljum, b'mod speċjali f'okkażjonijiet bħal dawn. "Nimmissjawk kuljum, iżda llum b'mod speċjali. Niftakru fid-daħka tiegħek, fil-kliem ta' kuraġġ tiegħek, u fil-mumenti kollha li qsamna flimkien. Dawn huma t-teżori li se nibqgħu nġorru magħna għal dejjem," kitbu.
Fit-tislima tagħhom, Adria Twins irringrazzjaw lil missierhom għall-imħabba u l-valuri li ħalla warajh. "Grazzi talli kont missier mill-aqwa u eżempju ta' saħħa, imħabba u ġenerożità. Għalkemm m'għadekx magħna fiżikament, il-preżenza tiegħek għadha tgħix f'qalbna u f'kull tifkira li nżommu għażiża."
Huma temmew il-messaġġ tagħhom b'awgurju emozzjonanti, "Nawgurawk għeluq sninek fis-sema, Pa. Dejjem maħbub u dejjem imfakkar. Inħobbuk għal dejjem."
Messaġġ li laqat il-qlub ta' ħafna persuni, li ngħaqdu magħhom biex ifakkru fil-memorja ta' missierhom u jwasslulhom kliem ta' kuraġġ u sostenn.
Facebook / Adria Twins
